政情：葉劉否認陳家珮問樁腳攞「戶口簿」
立法會補選結果塵埃落定，喺港島區落敗嘅新民黨南區區議員陳家珮（Judy），早前遭多名地區人士傳出冇去拜票「打招呼」，選舉過後亦冇收到過Judy講多謝，有人更指選舉期間，有人問地區人士攞「戶口簿」（支持者聯絡方法）去拉票。新民黨主席葉劉淑儀尋日就澄清，謝票需時，又強調冇叫人交出戶口簿，因為咁樣做係違法同違反私隱。
指太多人幫過手 謝票需時
葉劉強調該黨並無問人攞戶口簿，即使自己嘅戶口簿都唔會畀Judy。佢話戶口簿係每位議員努力嘅成果，亦受到個人資料（私隱）條例保障，未得許可，不能轉交其他人，已再詢問過黨內負責地區聯絡嘅同事，絕無此事，可以保證支持者嘅個人資料唔會遭洩露。
喺謝票方面，佢話涉及多名政黨、社團等等，依家仍然努力謝票中，但太多人幫過手，需要時間逐一致謝。佢重申Judy今次喺補選中僅輸約九千多票，成績已經好好，唔能夠單單與一六年立法會換屆票數比較，因為今次係涉及建制、泛民兩大陣營嘅選舉。