政情：為撐青年市集 陳細潔棄生日假期
政府成日話鼓勵青年發揮創意，但冇平台又係齋噏。不過，保良局由尋日起一連十個周末，喺尖沙咀文化中心廣場搞「保良市集」，畀啲年輕人推廣自家手作品牌，發揮吓佢哋嘅創意，都有成六百個檔主先後參與。保良局主席陳細潔仲話為咗搞好個市集，特登取消咗原定去日本滑雪嘅生日假期，將啲時間花咗喺籌備市集上。
陳細潔話「保良市集」同以前細個時喺跑馬地、深水埗見到啲市集唔同，以前好多都係賣古董，但「保良市集」就匯聚咗好多手作藝術嘅精英，賣嘅係飾物、手袋、公仔等等，而市集嘅目的唔單止係為咗賣錢，仲係鼓勵藝術家互相交流，協助青少年投身藝術創作咁話！
提供平台學習營商
保良局副主席馬清楠都同意市集需要多元化，話佢以前喺外國見過啲市集都好熱鬧，食物種類多，又有大型書攤，而且可以以物易物，非常多元，認為香港都可以嘗試咁做。佢仲話有啲年輕人有創意、識設計，但唔識營商，所以「保良市集」除咗提供平台，仲可以畀機會年輕人營商，等佢哋學識推廣自己嘅產品，幫佢哋自力更生。