明年區議會舉行換屆選舉，各政黨已開始就選戰部署，新增嘅議席成為兵家必爭之地。人口增長最快嘅元朗區新增四席至三十五席，競爭亦係最大。聽聞建制派內部已啟動協調機制「分餅仔」，其中天水圍將有新居屋入伙，預料會新增嘅一席最為搶手，民建聯（民記）、工聯會、新民黨，以及實政圓桌都想「拗手瓜」爭過。
位於屏山嘅屏欣苑預計今年九月就落成，預料將新增近萬人口，極大機會被劃成新選區。雖然呢個屋苑仲未入伙，但民記一早已派人做地區工作，對呢個潛在新議席志在必得。工聯會同實政圓桌喺元朗區嘅影響力都集中喺天水圍，但係都對呢個議席虎視眈眈。
新民黨方面，黨內現任區議員王威信所在嘅市中心元龍區，將有多個私人樓盤入伙，選區有望「一開二」，新一席亦順理成章由新民黨接手。不過，為咗二○二○年立法會換屆選舉有更多樁腳，據悉新民黨要求拎多一席，目標正正係天水圍嘅新議席。由於未達成共識，嚟緊大半年各黨都會派人落去天水圍「熱身」，呢班人選嘅表現隨時影響建制陣營嘅「初選」結果。
卓妮