政情：蔣麗芸中氣十足 靠深夜練聲
立法會議員蔣麗芸（Ann）出名中氣十足，阿Ann就話唔止係因為佢天生底氣足，更重要係後天修煉有功。佢仲自爆成日夜麻麻會關晒屋企啲門窗嚟練聲，真係估佢唔到。
阿Ann話，香港空氣差，佢後生嗰陣氣管都唔算太好，成日都咳。但當年潮流興唱K，佢就搵咗個老師學唱歌兼練聲，所以依家先咁好中氣。佢又教路，練氣時先要坐定，再用力吸氣將肺部擴張，然後忍住唔好呼氣約十秒，再用力呼出啖氣。佢話呢種呼吸方法係一種腹式呼吸，日頭定夜晚練習都得，只要畀心機，沙聲都練得番好，仲可以幫個肺清除雜質添。
愛屋企唱K拉筋
阿Ann又自爆最鍾意喺屋企唱K當減壓，飲歌有《我要活下去》同英文歌《I Don't Know How To Love Him」。Ann又話，佢喺屋企時會捉住老公一齊拉筋做運動，不過老公次次都拉一秒就話︰「我拉完喇」，認真冇佢符咁話喎。