政情：家族生意喺關島 陳祖恒唔驚北韓導彈
早前喺一個活動見到香港工業總會副主席陳祖恒（Sunny），佢爸爸係福建社團聯會永遠名譽主席陳守仁，家族喺塞班及關島有好多生意。
早前北韓同美國關係緊張時，北韓領導人金正恩一度揚言會將導彈瞄準關島，唔知佢驚唔驚？Sunny笑稱都有些少擔心，但又未至於驚到要撤資嘅。
逢星期二陪爸爸
Sunny話佢哋係好早就到塞班及附近關島謀生嘅華人，經過四十年嘅發展，生意確實唔少，包括酒店、船務、石油、物流同飛機維修等等，仲代理好多生活用品，現時當地生意由佢嘅五哥打理。
近年少啲見陳守仁出席公開場合，Sunny就話幾兄弟姐妹平時各有各忙，但係都會確保每一晚都有人返屋企陪爸爸，仲排定更表添，逢星期二就係佢「當值」。照咁講，若果商界好友發現Sunny逢星期二就甩底，都要體諒佢嘅一份孝心喇！