政情：慳家蕭嘉怡為女買裙要長到腳眼
小朋友高得快，啲衫好快就唔啱着，所以唔少家長都會特登為子女買大一個碼。不過，政務司司長政治助理蕭嘉怡（Kathy）就更誇張，為囡囡買裙要長到落腳眼，所以今年過年毋須為囡囡買新衫，真係夠晒慳家。
早幾日喺一個場合見到Kathy、環境局局長政治助理區詠芷同埋民政事務局局長政治助理黎穎瑜，講起過年買新衫話題時，Kathy話早幾年佢幫囡囡買嘅裙依然稱身，不過囡囡高得快，相信出年就唔慳得，要添置新衫先得喇。黎穎瑜就話，囝囝只係腳長得快，所以上身衫都幾襟着，只係買褲較頻密。
區詠芷用環保利是封
向來支持環保嘅區詠芷當然無新年買新衫嘅習慣，但細個都有貪靚時候，會主動要求家人買新衫。另外，佢喺農曆新年都會用環保利是封，好處係可以集齊多種款式，派利是時畀小朋友自己揀選，除咗支持環保，仲氹到小朋友開心添！