中環出更：立會春茗 梁君彥暗寸泛民聽話狗？
立法會尋日中午同特區政府官員及行政會議成員春茗，多名問責官員、常任秘書長及行會成員都有出席。今年係狗年，立法會主席梁君彥致詞時就提到民間話狗有「八德」，即係忠、義、勇、猛、勤、善、美、勞，「唔係吠得」，引起宴會廳內一陣大笑。咁啱出席春茗嘅民主派議員都好安分，並未見有任何示威，唔通梁君彥暗寸佢哋似狗咁聽話？
黃碧雲冇追問僭建問題
尋日出席嘅民主派議員唔多，包括民主黨涂謹申、黃碧雲、身兼內會副主席嘅公民黨郭榮鏗、教育界葉建源及社福界邵家臻，而涂謹申同葉建源更坐喺第一席，與特首林鄭月娥及行會召集人陳智思同枱。黃碧雲就坐喺律政司司長鄭若驊隔籬，但都冇追問佢僭建問題，印證民主派真係幾聽話囉。
今次亦有唔少常秘到場，包括政制及內地事務局常秘鄧忍光、創新及科技局常秘卓永興，但係近日因為着住出位鳳袍而成為焦點嘅商務及經濟發展局常秘利敏貞就冇出席。全場着得最喜慶嘅係康樂及文化事務署署長李美嫦，佢雖然着住黑色外套，但上面亦有粉紅式嘅花，頗有中國特色。
卓妮