政情：今日你上鏡：梁敬國邱誠武難得酒會相遇

商務及經濟發展局前副局長梁敬國（Godfrey，圖左），運輸及房屋局前副局長邱誠武（圖右）早前喺中華總商會新春酒會相遇，各自攞住部手機低頭密密斟，傾嚟傾去都未傾完咁，唔通好耐冇見？Godfrey話其實一班前副局長都有約出嚟幾次o架，不過次次都唔齊人，好難約呀，月底將會再聚一聚，但佢就預告自己會甩底，因為屋企有啲事喎！唔知佢哋離開熱廚房，依家係咪輕鬆啲呢？邱誠武就話各有苦況啦，以前做官，最慘係肥咗好多，因為好多時成九點先食晚飯，依家冇做官，即刻瘦番好多呀！