港產官僚除咗吹水之外，最叻就係整色整水一味做騷。前排林鄭喺社交網站鋪文，話本港房屋問題非常嚴峻，土地供應刻不容緩，於是乎帶埋發展局局長同規劃署署長，一齊搭政府飛行服務隊直升機鳥瞰香港一周，結果「得到一啲靈感」喎。
高官搵地搵到上直升機，懶係「上窮碧落下黃泉」咁款，唔知嘅畀佢嚇死，知嘅就畀佢笑死。係人都知，香港地雖然話係地少人多，但其實唔少靚地長期丟空養蚊。舉個例子，政府現有廿二個過剩物業，其中八個係荒廢多年嘅前政府宿舍，唔少位處市區靚地，施政報告提出善用類似閒置建築物作過渡性房屋，結果唔使問阿貴，又係講咗等於做咗，整整吓冇咗下文。
記者去現場睇過，發現部分宿舍唔單止佔地寬廣，而且設施齊全，廚房廁所等應有盡有，有啲就鄰近私人會所及臨時遊樂場，交通尚算就腳。呢啲宿舍最起碼丟空五年，最長嘅超過二十年。有建築及工程界人士就話，改裝政府宿舍作過渡性房屋絕對有得諗，只要稍事翻新吓喉管，三、四個月就搞得掂，唔單止居住環境完勝劏房，估計每個單位翻新費用約數十萬港元，符合經濟效益。查實唔使專家多講，時不時都有「識貨之人」已經用腳投票，侵佔閒置宿舍，吸引力可見一斑。
講開又講，官地嘥料已經係老大難問題，點止閒置宿舍咁簡單。淨係閒置校舍用地，全港加加埋埋就有一百八十幾幅，最誇張嘅個案，四十多年一直無人問津，奈何教育局「生人霸死地」，一直唔肯交還政府，連申訴專員都忍唔住狂炳。至於全港空置街市、私人會所、公務員宿舍、權貴俱樂部，以至遭非法霸佔嘅官地，更加係三日三夜都數唔完。正所謂集腋成裘，如果好好利用呢啲閒置土地，大庇天下寒士，就唔使咁多人跪地餼豬乸，連豬欄雞棚貨櫃改建嘅劏房棺材屋都唔放過，輪公屋長龍就唔會長過萬里長城喇！
大家見到啦，港產官僚成日呻「地從何來」呻到樹葉落，開口「見縫插針」、埋口「寸土必爭」，原來只係呃鬼食豆腐。最離譜嘅係，咁多空置土地官老爺唔去利用，偏偏捨近求遠，捨易取難，唔係諗填海，就係諗發展岩洞，唔係打郊野公園主意，就係毀人家園，市民唔嘈到拆天至奇！
始終都係古人講得啱，為政不在多言，顧力行何如耳。港府早前大鑼大鼓成立土地供應專責小組，話要就開拓土地優次凝聚共識喎，咪畀人睇死，最終咪又係煲無米粥！