政情：同Ming仔撞樣 許智峯想互調身份
近年愈來愈多人自己拍片剪片，成為網絡紅人（KOL），吸引唔少年輕人都想投身KOL行列。網絡紅人「Ming仔」（原名梁嘉銘Tommy）尋日出席一個青年活動時，就講述自己嘅奮鬥史，同場嘅仲有立法會議員許智峯（峯鴿）。佢哋兩個企埋一齊時外貌都有幾分相似，驟眼睇都幾可亂真。峯鴿仲建議兩人交換身份添！
均喺加拿大讀過書
Ming仔同峯鴿尋日第一次見，被問到覺唔覺同對方似樣，兩人對望幾秒齊笑稱「都有啲喎！」佢哋傾傾吓仲發現Ming仔係港島區選民，而港島區正係峯鴿選區。兩人又被問到有冇興趣合作拍片，Ming仔就話有得諗，峯鴿更建議兩人交換身份，Ming仔去示威，佢就去拍片喎。
此外，原來峯鴿同Ming仔年輕時都喺加拿大讀書，仲要兩個都係讀到一半返港。峯鴿○三年返港從政，Ming仔就讀到半路去做電視台，一○年回流香港。而Ming仔細峯鴿兩年，大家都係八十後，唔怪得咁啱嘴形啦。