政情：港交所「貝字牆」清潔龍阿德都抽水

香港交易所由交易大堂改裝成的金融大會堂日前舉行開幕禮，但當中一幅位於香港金融博物館門外的「貝字牆」卻成為熱議焦點，因字牆上出現多個貶義字，如賊、賄、賂、賤、貪等，更被指設計像「骨灰龕」，港交所已表明會執一執幅牆。不過，社交平台接連跟風抽水，就連食環署開設的「清潔龍阿德」專頁亦跟隊抽埋一份。

身為食環署清潔香港大使嘅「清潔龍阿德」前日喺其Facebook專頁貼文，以「中文字博大精深」為題，開頭首句就指出「貝字部可以砌到好多字，但『清潔』嘅三點水旁都可以砌好多字o架！」其後又指「凡事都有兩面，有地方好『潔淨』，亦會有地方有『污漬』」，似要呼應港交所回應與金錢相關的字意義有正有反一說。

最後阿德更大講道理，指「做人唔可以淨係睇好嗰面，亦要面對不足之處，多加改善啊！」不少網民睇完後大讚阿德「靚抽」，笑指「乜水都畀你抽乾晒喇」，以諧音揶揄問阿德「做乜串港膠（交）所呀？！」