中環出更：張國鈞長衫馬褂示人 豪言挑戰利敏貞
商務及經濟發展局常任秘書長（通訊及創意產業）利敏貞喺農曆新年後首個工作日以一身「鳳袍」示人，旋即引起市民對時裝嘅關注。立法會議員張國鈞（Horace）尋日出席活動亦以搶眼打扮示人，更豪言要將市民嘅注意力從官員身上奪回，到底成唔成功呢？
應節造型迎來歡呼聲
Horace尋日以長衫馬褂造型出席新春團拜活動，上台致詞時台下即傳來歡呼聲，似乎在場人士對其造型評價唔錯。Horace話，新春期間嘅社會焦點被政府官員嘅時裝搶走，作為議員嘅佢心有不甘，因為社會意見同埋焦點應該由議員帶動，所以佢要從官員手上攞番焦點，明顯係向利敏貞下戰書。
Horace解釋，長衫馬褂係民國初年嘅官式服裝，但因過於繁瑣，之後先化繁為簡改為着中山裝，睇嚟佢都做足功課先買衫。佢又話呢身造型只為應節，唔係出席新年活動都唔敢着出街。而佢因活動後要趕去健身，所以離開時已換番便服。至於置裝費用係幾多，佢就唔肯透露，仲話太太問時都冇回答。佢咁講，睇嚟價錢都有番咁上下喎。
卓妮