政情：新界族群遭狙擊 劉業強人日開炮

新界原居民過往曾舉辦多次大型集會反映需求，並且高舉捍衞傳統權益嘅旗幟。而原居民除咗面對僭建、收地問題，佢哋所擁有嘅丁權亦多次遭人質疑而成為主要攻擊目標，好似上月就有團體發表研究報告，指新界有近萬幢丁屋疑似以套丁方式興建，更有市民就丁權政策提出司法覆核添！樣樣問題都同原居民生活有密切關係，所以劉業強要用強硬措詞並非無原因。

鄉議局尋日按照慣例，喺大年初七舉行新春團拜，多名主要政府官員、鄉紳同地區人士都有出席，場面非常熱鬧。然而，劉業強未有因此而畀面到場嘅達官貴人，除咗抨擊過往針對鄉議局同原居民嘅人士外，亦有談到政府嘅施政問題，果然充分利用其主場之利，直接向相關人士表達意見。

劉業強話鄉議局過去一年受到別有用心嘅人士不斷挑釁同攻擊，特別係有關《基本法》第四十條嘅司法覆核案所帶來嘅挑戰。佢指呢宗挑戰丁權嘅法律訴訟，將會喺今年底開審，直言已經引起新界嘅海內外原居民嘅惶恐，更係繼二○一五年套丁案後，又一次衝擊原居民嘅事件。佢更講到，今次所面對嘅案件不僅惹起新界大恐慌，仲會進一步加劇城鄉矛盾，長遠會影響香港整體發展同國家治港形象喎。

指新界收地賠償低

另外，佢又認為原居民喺新界發展過程中，未能分享到發展所帶來嘅紅利，反而只有遠低於市值、行貨式嘅收地賠償以及拆村同搬村，所以會令到原居民同土地持有人覺得，政府係借公眾利益之名，實為霸地盤、收地同剝削其利益。佢更明言，未來香港整體規劃同發展將會聚焦新界，所以講明希望政府發展新界時，要多啲諮詢鄉議局。

雖然鄉議局已成立逾九十年，但劉業強依然唔敢鬆懈，仲認為今年係對鄉議局重大危機同挑戰嘅重要一年，直言要保持清醒頭腦，高度嘅警覺心同憂患意識去面對黑夜嘅來臨。睇嚟佢都諗得好悲觀，難怪新正頭已經要開火做定準備喇！