政情：批評錢大康加人工陳樂行計錯數
浸會大學經歷早前學生佔領語文中心事件之後，浸大校長錢大康成為部分學生嘅狙擊對象，有份參與佔領嘅中醫學學生陳樂行成立嘅「浸大山神」，尋日喺Facebook發出貼文，引用浸大過去三個年度嘅財務報告，以錢大康為全校最高薪人士作估計，批評錢大康上任兩年間至少獲加薪約二百萬元，批評校方「對校長闊佬，對基層員工就相當刻薄。」但原來佢計錯數喎。
斥冇為基層員工發聲
貼文指浸大排名雖然落後五大，但錢大康上任後即刻加自己人工逾二百萬元，至今已達七百二十萬元，戲謔終於令浸大有項排名（即校長年薪）可以傲視全港。貼文又舊事重提，批評錢大康喺舊年中保安、清潔工遣散費爭議中，冇為低層員工發聲，「清潔保安公司欠款亦約百萬，但校長人工就照加，基層員工被剝削，錢校長有否出過半句聲？」
不過，浸大發言人澄清，錢大康喺二○一五至一六年財政年度只有十個月受僱於浸大，所以整體薪津與二○一六至一七年度不同。基於私隱，大學不會透露個別教職員嘅薪津。發言人重申，大學校董會釐定校長嘅薪津時，會考慮一籃子因素，包括工作表現、大學財政狀況同市場環境等。