新正頭，大家開開心心，和和諧諧，當局執法都會鬆手少少，例如違泊，阿Sir一般隻眼開隻眼閉。之不過執法鬆手都要有個譜，南亞無牌小販兵團擺通街唔理，啲人周街亂放煙花又唔理，特別係後者，萬一搞出人命，官老爺點孭得起隻鑊！
網上最近瘋傳一段影片，有人大年初二晚喺馬鐵沙田圍站附近放煙花。片段可見，短短十秒連爆六響，火燄去到路軌頂咁高，附近街坊就算睇唔到都聽到巨響，有人仲驚到報警求助添。
私放煙花年年有，今年偷雞特別多。除咗沙田，市區仲有好多地方同樣係「炮聲隆隆」，唔知嘅仲以為爆炸。好似喺秀茂坪咁，初三有人放煙花，過程持續超過三分鐘，響聲傳遍整個觀塘區，可以話係迷你版煙花匯演。
可能放煙花嘅仁兄心諗，今年政府取消年初二煙花匯演，依家公諸同好免費益街坊，多謝冇句不特止，仲要喺度嘈嘈閉？嗱，呢鋪講法要戒啦，就講馬鐵站吖，萬一電纜搶火，又或者燒着街邊車輛，後果簡直不堪設想。你知喇，香港人流密集，四圍都係易燃物品，亂放煙花隨時一鑊熟。唔係嚇大家，內地廣東同雲南最近相繼發生煙花爆炸意外，造成多人死傷，香港至今平安無事，只係好彩嘅咋。
弊就弊在好多人就係因為咁而抱僥倖心態。最近時興上大嶼山大東山芒草堆，一路玩俗稱「神仙棒」嘅煙花棒一路影相，據說可以營造「唯美」效果喎。家陣風高物燥，一個唔好彩星火燎原，重演八仙嶺一幕，咁就唔慌唔唯美嘞！
真係諗極都唔明，香港禁放煙花炮仗幾十年，法例亦講到明，非法藏有煙花炮仗最高可判罰二萬五千元兼入獄六個月；私放炮仗亦有機會入獄三個月，但點解從來冇人被捕？鬼咩，警方次次都係賊過興兵，收到投訴至做嘢，啲人一早好似南亞小販咁散晒水啦。就連亞視舊廠炸彈案嘅辯護律師都借題發揮，質疑私放煙花危險性更大當局都唔檢控，擺明玩針對打壓，你話係咪吹脹吖。講開又講，啲煙花十居其九來自內地，竟然可以瞞過當局檢查，輕鬆過關，今次就話煙花啫，下次恐怖分子偷運炸彈入境，仲得了嘅？
有人形容佔中之亂打開潘朵拉魔盒，一次過釋放晒人嘅獸性，一唔老利就鬧人兇人發爛渣投訴人，「蝴蝶效應」下最終導致巴士翻側慘劇。咁又係吖，有啲人眼中只有自己，阻住成個香港運轉都得，放幾個煙花更加係閒過立秋，加上當局有法不依，執法不嚴，成個香港又點會有運行吖！