政情：鍾國斌遊明洞 -5℃歎雪糕
南韓平昌冬季奧運會喺今個月九日開幕，港隊亦獲入圍資格赴當地出賽。適逢農曆新年假期，立法會紡織及製衣界議員鍾國斌（Felix）帶埋神秘女子到南韓旅遊，尋日仲喺Facebook上載相片，喺明洞街頭食成呎高嘅巨無霸雪糕（圖）。Felix打趣話，大家要試吓零下五度食雪糕嘅滋味，包你感覺為之精神一振，同埋好飽喎。
首爾呢款雪糕都算幾出名，唧出嚟有成呎高，仲傳到去台北淡水都有得賣，如果夏天食就要好快食晒，唔係會融到一手都係。不過，南韓今年較往年凍，漢江早已結晒冰，氣溫經常維持喺零度以下，咁凍食巨無霸雪糕包唔會融喇！
平昌睇冬奧比賽
其實早喺年三十晚，Felix已經喺平昌睇滑雪賽，連日嚟不時更新Fb同大家分享行程，包括去睇滑雪、冰上曲棍球比賽，期間仲遇到當地遊行，見到警察仲多過示威者，Felix認為香港嘅示威者比較斯文，所以警察人數都相對無咁誇張。行程咁豐富，今個假期仲唔係叉足電？
（互聯網）