政情：楊岳橋去舊愛宿舍 自爆玩到響警鐘
一向好識玩社交媒體嘅公民黨黨魁楊岳橋（Alvin），不時搞爛Gag講政治，佢仲趁新年自爆秘密，拍片講自己曾經上前女友宿舍，最後仲搞到響警鐘添！到底上去做咩呢？呢個人相當有嫌疑！
Alvin最初推出嘅節目叫「ThisAY」，明抄色情網站嘅名，佢尋日喺社交網站上載新片「AY810」，就明抄某電視節目，請嚟戴住公仔頭盔嘅社會各界人士，一齊討論社會時事。
架車擋路引致
節目預告片中，Alvin突然講起有次上咗前女友宿舍，有嘉賓即刻追問「做咩啊？」Alvin即刻笑住話「上去探佢研究功課」，點知突然響警鐘，嘉賓又問「有無着衫啊？」Alvin答唔到嘴，似有還無地答「唔係，唔關事」，之後就無再講落去。Alvin大賣關子，用前女友故事嚟吸Like，但大家只想知到底Alvin有冇着衫，多過時事問題囉！
節目正式出街，原來係Alvin揸車去搵舊愛時，將架車泊咗喺迴旋處入口。當佢聽到警鐘響後，又聽到消防車聲，就知道架車阻住大車入，即刻要飛身落去揸走架車，有冇着衫就不得而知嘞！