政情：姚祖輝周圍飛 跑步紓時差
政商界人士工作繁忙，周圍飛係平常不過嘅事，但最痛苦莫過於Jet Lag（時差問題）。海上絲綢之路協會名譽會長姚祖輝話自己一年飛約五十次，即係平均一星期都要飛一次，但係佢飛去唔同嘅地方都瞓得唔錯，原來佢對抗Jet Lag嘅秘訣，就係跑步。
戴埋手帶記錄運動量
姚祖輝話自己去到一個地方，如果有預感當晚會瞓得唔係咁好，就會走去跑步，覺得做完運動後，的確係舒服同放鬆好多，跟住就會相當好瞓o架啦，依家仲會戴住智慧型運動手帶，記錄住自己嘅運動量同睡眠質素添！
佢坦言好鍾意跑步，覺得真係會上癮，好多人都問過佢怕唔怕傷膝頭，佢就慶幸自己未傷過，為咗避免受傷，佢都會放鬆咁跑。佢仲話唔單止自己鍾意跑步，亦不時會提醒同事一定要保持身體健康，反對同事只顧工作喎。