政情：有相為證：梁繼昌超市買麵作賀年禮物
呢幾日大家都趕緊去買定年貨同賀年禮物，立法會會計界議員梁繼昌（Kenneth）尋日亦都去超市掃貨，但佢就唔係買經常喺賀年禮物清單上見到嘅朱古力同曲奇餅，而係買麵。佢話曲奇餅同朱古力都係唔健康嘅食物，佢收到都好少食，通常轉贈畀人，而佢買嘅麵係香港出產，夠晒健康，又有益，又一定食得着唔會嘥喎。
Kenneth尋日下午現身中環一個大型超市櫃台，原來佢係等緊超市職員幫佢包禮物，而啲禮物全部都係麵嚟嘅。佢就話啲麵係買嚟去拜年時送畀朋友嘅。買完麵之後，佢就入咗一間個人護理用品店。以為佢係入去買情人節禮物畀太太啦，點知佢幾秒鐘之後就行咗出嚟。佢話係屋企剃鬚膏用晒，原本想入去買，但店員話賣晒冇貨，所以佢咪咁快出番嚟囉！
情人節喺屋企煮飯仔
咁尋日情人節，佢同太太點樣慶祝呢？Kenneth就話會留喺屋企煮飯仔喎。呢頭講完，佢就急急腳上咗的士喇。睇嚟佢真係歸心似箭噃！