政情：術數師：狗年官場爭鬥 或有局長下台

木火較旺 易有屬土災禍

楊師傅話狗年木火比較旺，火庫一開就會發生屬土的災禍，所以立春後正式踏入狗年，台灣有地震、香港又有車禍，佢特別點出狗年要特別注意嘅月份，其中農曆五月怨氣好重，可能有大企業會倒閉，引發啲「嘈喧巴閉」嘅事；農曆六月，國際上屬北面嘅地方會發生重大事故，容易有大火災、大爆炸、病毒等，而上半年空災特別多，立秋後就開始轉好。而農曆七、八月氣場亦唔好，容易有大型交通意外，尤其係西區，例如西環、西營盤、上環，荃灣、屯門，呢兩個月出入、駕車要特別小心。

至於官場熱廚房亦唔好得去邊。楊師傅話農曆九月官場會有麻煩出現，例如官場明爭暗鬥等，由於政治影響經濟，政治不穩，經濟就會變差，農曆九月可能有某位局長牽涉重大事件，甚至引發下台危機。至農曆十月，西方國家易有火山爆發，農曆十一月，包括香港在內的東面，易有泥石流、山泥傾瀉、撞車，而東面國家及地區或發生地震。

經濟十年最差 謹慎投資

至於狗年經濟方面，楊師傅話一八年係近十年來最差嘅一年，要跨越冬季，到一九年經濟才會開始好轉，所以今年投資、買樓同重大發展，一定要睇清楚。佢又話由於狗年土火旺，一定要行金運，農曆七、八月會向好，即使投資者喺上半年有損失，相信下半年可以收復失地，而偏門行業在下半年亦特別興旺。都係嗰句，風水命理同八字批算，目的都係想幫人趨吉避凶，但信則有、不信則無，好與壞都毋須太上心。