中環出更：五賀歲犬四圍跑 陳健波忙亂似開財會
臨近農曆新年，唔少有心嘅議員都會拍番條賀歲片，同大家賀狗年。立法會財務委員會主席陳健波（波哥）就特別問朋友借咗五隻非常可愛嘅白色狗仔拍片，同大家拜早年，祝大家狗年大旺，但只有一、兩隻肯坐定定，其他狗仔不斷跑嚟跑去，仲要打交添！波哥笑指，好似財委會開會情況咁，只有部分人肯坐定定，搞到佢手忙腳亂呀！不過，佢喺片段中仍然好淡定咁同大家賀年，睇嚟喺財委會訓練有素！
拍咗個幾鐘先一齊入鏡
點解啲狗仔咁啱全部都係白色嘅？波哥話今次呢五隻狗仔係一家人嚟o架，其中三隻細狗只有三個月大，原本已經有唔同嘅家庭領養咗o架啦，今次適逢過年，特別一家團聚幫拖拍賀歲片，但係狗爸爸同三隻小狗都特別活潑，不斷四圍跑，一放開仲要打交添，真係好難控制，佢試過想一手抱住三隻，但做唔到，總會有一隻偷走出嚟，最終拍咗超過一個鐘，先至拍到五隻狗仔一齊入鏡嘅畫面呀！
波哥喺片段中嘅新年賀詞都相當有心，同五隻狗仔一齊祝大家五福臨門，又以同音字，祝大家情人節「天長地狗（久）」，投資方面就「十拿狗（九）穩」。
卓妮