政情：八網難逃：飛芬蘭落冰海 鍾樹根扮龍蝦
鍾樹根冇做立法會議員之後專心務農，成日都周圍去，仲一年飛成七十次。農曆新年臨近，務農生意收爐，佢又再飛喇，今次佢就係同屋企人飛去芬蘭度假，佢仲着到紅卜卜咁落海扮龍蝦添！
「畀錢赤過跌落水」
話說樹根就喺社交網站Facebook上載咗佢喺海上漂浮嘅短片，見佢畀教練喺雪地上面推咗落海，喺冰海上嘅樹根浮吓浮吓都幾過癮，仲話自己扮龍蝦添！呢段短片上載之後，唔少網友都大呼好玩，仲問呢次下海要幾多錢？不過，樹根就話，呢個坐破冰船「套餐」唔止可以坐破冰船、喺冰海暢泳，仲包埋個BBQ燒烤午餐，但就每位三百七十五歐元（約三千六百港元），笑言「畀錢赤過跌落水」咁話喎。
其實喺扮龍蝦之前，樹根亦去過聖誕老人村，話嗰度真係有聖誕老人，但唔會見你，所以佢可以喺聖誕老人屋企，扮聖誕老人寫信寄返香港自己屋企，認真搞笑。