政情:蔡堅大病初愈 新年無啖好食

早前患「胃扭轉」而留醫ICU嘅醫學會會長蔡堅大病初愈,尋日終於出院。佢喺Facebook上載近照,留言多謝各方好友連日來關心和問候。佢同我哋講依家留喺屋企休息,最慘係農曆新年要忍口無啖好食,預計到年初八仍要食粥等流質食物,不過佢比起上周精神咗唔少,而且仲識講笑:「人老咗,點都要戒口喇!」

患胃扭轉 傷口仍滲血

蔡堅上周喺Fb上載身在深切治療部丶病入膏肓嘅相片,透露患上本港唔太常見嘅「胃扭轉」,胃部移位至橫膈膜上,兼且嘔血,需入院接受四小時手術。蔡醫生尋日又再喺Fb更新個人狀況,上載咗張相係佢半躺窗邊歎日光浴,同上周臉容瘦削比較,完全判若兩人。

蔡醫生解釋,事關佢上周留院期間胃部曾出血達3,000cc,身體缺水之際,身形亦隨之「縮水」,出院後身體已慢慢復原,但未算好番晒,現時手術嘅傷口仍會滲血同隱隱作痛,行大步啲都有困難,身體唔能夠有大動作活動。

第一手消息請下載on.cc東網iPhone/iPad/Android/Windows Phone Apps