中環出更:盼學生開心放假 葉建源寫揮春反操練

年近歲晚,唔少立法會議員都會寫揮春送畀街坊市民,立法會教育界議員葉建源尋日喺立法會擺檔寫揮春,仲即席寫咗副對聯「快快樂樂冇操練,不要操練過新年」,希望學生哥可以開心過年,當局取消BCA(基本能力評估),仲順道寫咗一張「東方日報 網紙風行」畀東網同《東方日報》,並祝東網同《東方日報》讀者新年進步,身體健康。

陳沛然笑言擺檔爭生意

話說喺擺檔期間,路過嘅醫學界議員陳沛然(Pierre)講笑,話佢都要攞埋血壓計擺檔,勢同葉建源爭生意咁話。聽到Pierre話要爭生意,葉建源亦都反攻,話要寫張「醫醫相衞」揮春畀Pierre,嚇到Pierre掉頭走,最後葉建源就寫咗張「仁心仁術」畀佢,Pierre今次應該收貨喇啩!

跟住人稱「象哥」嘅進出口界議員黃定光亦都經過,葉建源即刻寫咗張「龍象精神」畀佢,象哥即刻大讚葉建源手字靚。葉建源就話好多年前學過兩堂寫字,一直都有練習,唔係臨急抱佛腳。

卓妮

第一手消息請下載on.cc東網iPhone/iPad/Android/Windows Phone Apps