政情：結婚周年慶祝 郭偉強揀執屋
立法會議員郭偉強早排結婚三周年紀念，加上情人節又將近，照計應該會特別有心思去策劃慶祝活動。然而佢話當日唔單止冇慶祝活動，仲要喺執屋中度過。咁冇情趣？
新居裝修完 忙於清潔
由婚後至囝囝出世都依舊與父母同住三百平方呎單位嘅郭偉強，終於喺上年成功上車，但上車大半年都仲未正式入伙。不過，新居嘅裝修工程終於喺幾個星期前完工，所以佢同太太呢排咪要忙於清潔，又要螞蟻搬家咁密密搬，希望趕得切喺農曆新年前入伙囉，難怪兩公婆冇閒情去慶祝喇！
郭偉強仲話近期晚晚都去做清潔，但仍然覺得未夠乾淨，新居仲有微粒出現，睇嚟呢位爸爸為咗囝囝都好緊張。不過，目前距離新年非常接近，咁短時間就可以搬到入去？佢就話新居冇傢俬，更透露唔打算買梳化，因為新居窗台面積大，為咗慳位，打算放置咕o臣當梳化喎。
不過，佢仲有一個問題未解決，就係新居附近欠缺泊車位，作為「柴可夫」嘅佢都直言頭痕，因為太太同囝囝出入都由佢包辦。