中環出更：曾蔭權發賀卡 網民嘲遺臭萬年
新年將至，唔少人都會寄賀卡送上祝福。立法會議員毛孟靜日前喺Facebook上發貼，指自己收到前特首曾蔭權爵士寄嚟嘅新年賀卡，賀卡上更出現隱藏版「煲呔」。賀卡貼文一出後，引來唔少網民留言談論佢涉貪入獄，更有網民留言指佢「遺臭萬年」，並揶揄佢當年停起居屋惹來社會不滿。
曾蔭權早前因一項公職人員行為失當罪判囚，正保釋候上訴，但佢仍以前特首嘅名義設計同發送新年賀卡。據毛孟靜所貼出嘅賀卡，封面印有「福」字嘅中國結，更以「如意結」作襯托，但喺「福」字下嘅末端卻出現一個長方形嘅空隙。
卡紙穿窿唔吉利
賀卡內部除咗印上「萬事勝意」、曾蔭權嘅簽名外，佢更標明自己曾喺二○○五年至二○一二年出任特首，似乎對特首一職非常留戀。此外，賀卡內亦有一個貌似複翼盤長結，而複翼更可摺起，形成「煲呔」狀，睇起應該係將摺起部分穿過封面嘅長方形空隙。不過，賀卡上內部嘅中國結睇起嚟「無頭無尾」，而且賀卡上出現「穿窿」，臨近農曆新年似乎唔太吉利。
毛孟靜話收到呢張卡感到唏噓，有網民質疑佢係咪同曾蔭權「好friend」，但佢就回應話唔認識曾蔭權，又話相信所有立法會議員都收到賀卡。
卓妮