屬天王、天后級嘅藝人黎明及謝安琪，近日先後質疑流感疫苗嘅成效同副作用，雖然政府同醫學界已多番澄清有關謬誤，但唔少家長聽咗兩人講都信以為真，唔敢再畀啲仔女打疫苗。港大感染及傳染病中心總監何栢良尋日上電台時，就呼籲呢啲天王級嘅藝人高抬貴手，唔好再亂噏醫學問題，強調「凱撒歸凱撒，娛樂歸娛樂，醫學歸醫學」。咁又係嘅，如果個個家長都唔帶啲仔女去打疫苗，流感互相傳染嘅風險就會增加，梗係要急急澄清喇！
