政情:「似家電會壞唔奇」 陳帆叫體諒港鐵

港鐵尋晚喺仍未通車嘅沙中線啟德站舉行晚宴,運輸及房屋局局長陳帆擔任嘉賓。港鐵頻頻出現故障,市民都怨聲載道,陳帆就喺致詞時叫大家體諒,仲話好似屋企啲家庭小電器咁,會壞都唔出奇,叫大家唔好成日只係講罰,都要畀啲鼓勵喎。如果打工仔因為港鐵故障而返工遲到,唔知啲僱主係咪會唔追究兼鼓勵員工呢?

沙中線晚宴「神秘嘉賓」

陳帆之所以成為晚宴「神秘嘉賓」,其實係因為同港鐵主席馬時亨有段淵源。馬時亨話,當年佢任商務及經濟發展局局長時,昂坪纜車車廂墮下,時任機電工程署助理署長嘅陳帆經常同佢去視察同周圍解畫,兩人可以話係親密夥伴。

不過,陳帆原本都請咗馬時亨「食檸檬」,因為佢打算放假,但因為立法會高鐵一地兩檢法案委員會本周開會,佢要留港坐鎮,先至會應邀出席晚宴。

第一手消息請下載on.cc東網iPhone/iPad/Android/Windows Phone Apps