政情：眾志年宵賣囚衣 大吉利是
維園年宵市場尋日開鑼，又係啲政黨政團攤檔賣嘢籌募經費兼宣傳嘅時候，尋日就一共有七個民主派組織嘅維園攤位開檔，包括香港眾志、民主黨、人民力量、社民連、工黨、公民黨同支聯會。當中以眾志售賣嘅商品最「騎呢」，包括以囚犯為主題嘅T恤，新正頭就叫人坐監，認真大吉利是囉！
眾志攤位嘅商品包括毛巾、布袋、圍裙，以及有黑同白兩隻色嘅T恤，衫上印有一隻唔知係狗定貓嘅卡通動物，手持疑似囚犯編號，拍攝入冊前嘅犯人相，唔止唔符合新年氣氛，直情係大吉利是添。
羅冠聰話有警世意味
本身真係坐過監嘅眾志主席羅冠聰解釋，衫上嘅囚犯係象徵肯講真話嘅人，反而會受罰坐監，大讚件T恤嘅設計有警世意味。
羅冠聰同眾志秘書長黃之鋒早前獲終審法院放生，毋須喺獄中過年，但同時涉及反東北案及佔旺藐視法庭案嘅社民連副主席黃浩銘，仲要喺赤柱坐多幾個月。
社民連喺今年嘅維園攤檔放咗三個黃浩銘人形紙牌「紀念」佢，該黨前立法會議員梁國雄慨嘆「年宵萬眾歡慶，今年獨惜浩銘」，但佢認為喺獄中過年係「人生難得經驗」，料阿銘會有更大得着。