政情：酒匠黃傑龍赴京都學釀清酒
香港餐飲聯業協會會董黃傑龍（Simon）唔止鍾情日本清酒，更獲日本政府承認「榮譽唎酒師酒匠」嘅資格，係日本酒界嘅最高榮譽。佢近日就去咗日本京都一間清酒公司，親自釀製清酒。佢為咗參與每一個步驟，就算當地天氣只得零度，都每日清晨五時就起身開工，真係捱得。
體會日本人專注堅持精神
愛酒嘅Simon最近去咗京都一間有三百八十多年歷史嘅清酒公司，跟嗰度嘅大師學習釀製清酒，差唔多每個步驟佢都親手參與。
佢每朝五時起身後，大家要先一齊祈禱，而釀酒用嘅每包米都要精確記錄重量，然後要人手洗米，仲要計時，每一粒米飯都唔可以浪費。但點解要咁早起身釀酒呢？佢解釋係要用清晨嘅冰凍空氣，去冷卻啲蒸米。
不過Simon親手釀製嘅清酒仲未可以品嘗，因為要等發酵廿八日後，清酒公司送番香港先飲得。Simon又話，今次最親身嘅體會就係日本人清潔、專注、精確、堅持嘅精神。唔知佢會唔會將呢啲精神投入喺佢經營嘅餐廳中呢？