政情：補選爆分歧 疑因財失義 社網聯內訌瀕瓦解

違法佔領行動（佔中）結束後，多個本土派地區組織應運而生，紛紛派人參加二○一五年區議會選舉，與建制派及傳統泛民抗衡，但由於勢孤力弱，缺乏資源，最後只有極少數本土派候選人勝出。為咗迎戰明年區選，六個分別來自葵青、沙田、荃灣、屯門、天水圍及藍田嘅本土派地區組織，喺去年八月宣布結盟成立社網聯，希望可以互相扶持，分享資源，為未來補選或換屆選舉鋪路。

劉頴匡遭DQ後引發退聯潮

社網聯發言人劉頴匡，早前宣布參加立法會新界東補選，希望為該組織打響名堂，但由於社網聯內部對參加補選有不同意見，劉頴匡其後須辭任發言人職務，最終更被選舉主任DQ，達唔到原來嘅宣傳效果。到咗前日，「荃灣社區網絡」同「葵青連結動力」先後宣布退出社網聯，社網聯公關黃丹晴更辭埋職。有消息指嚟緊會有更多組織同成員退出，令社網聯瀕臨瓦解。

有指今次「退聯潮」，係因為不同組織及成員對下月立法會補選嘅投票立場出現分歧。有人認為喺所有本土自決派參選人被DQ後，佢哋與其支持者應該全面杯葛選舉，唔應該「含淚」投票支持傳統泛民嘅候選人；亦有人認為應以大局為重，否則只會益咗建制派。至於另一說法係，傳統泛民已開始就明年區選進行協調，並透過佔中發起人戴耀廷接觸社網聯，希望本土派唔好同泛民參選人撞區，但部分本土派堅拒讓路。

不過，亦有消息指今次「退聯潮」嘅觸發點，係同社網聯在旺角花墟年宵市場開設嘅年宵攤位有關。該攤位原定幫整個社網聯籌募經費，支持聯盟內各組織嘅地區工作，但劉頴匡近日突然喺社交網站宣布，將籌款目的改為補償佢早前已支付嘅選舉經費，以及資助佢就DQ事件提出嘅選舉呈請，令聯盟內其他組織見財化水。無論真正原因係乜，事件再次凸顯不論係民主派定本土派，想做到團結一致，槍口對外，睇怕要早啲瞓發個好夢先得。