中環出更：深水埗建設計時裝基地 潮人齊撐
深水埗雖然係舊區，但亦係唔少喜愛服裝同設計嘅潮人流連熱點，事關當地有好多售賣布料同配件嘅批發零售店，最近政府決定喺區內建立設計及時裝基地，令唔少人感到雀躍。著名高級訂製時裝設計師丘雪祺（Cecilia）同「放射科女王」、香港放射科醫學院創院院長梁馮令儀都係深水埗常客，早前梁太仲趁周末到深水埗入貨添。
梁太唔係設計師，點解去深水埗入貨？原來佢好鍾意做手作，經常喺出席國際會議時，自製會議袋及窩心小手作派發畀與會者，最近佢就設計咗一個福字鎖匙扣，相當有中國味，而且喺農曆新年好應節。
梁馮令儀丘雪祺都係常客
梁太笑笑口話，自己每星期都會去深水埗兩次，當日佢就去大南街一間皮具店探望老闆夏生，梁太話同夏生好熟，佢設計嘅皮件手作多數交畀夏生製造，老闆仲教識佢用啤窿機添！梁太仲講笑話，如果畀佢從政，應該做深水埗區議員喎！
至於Cecilia都係深水埗常客，早前佢就一個人喺大南街、基隆街及汝州街一帶閒逛，期間入咗金屬扣配件及織帶等店舖尋寶。Cecilia笑稱，不時會到深水埗睇吓有咩新趨勢，順便搵設計靈感。佢讀書時經常落嚟深水埗搵布同配件，但依家布料多數直接喺外國入口，相對少咗親自落區嘞。
講起最近深水埗將建立設計及時裝基地方案，Cecilia都覺得係好事，但希望將來基地可以行高科技及高增值路線，方便從事高級訂製時裝嘅設計師搵到配套所需。
卓妮