南亞幫劫巨款 警長述擒匪「擔心佢跌死」
尖沙咀南亞匪幫截劫逾四億日圓巨款案，目前最少仍有五名匪徒在逃，至於警方在該宗劫案除果斷採取「捷進」行動，成功堵截賊車外，數名勇擒疑匪的衝鋒隊警員，更是功不可沒。
聞匪跳橋 督察「心離一離」
西九龍總區衝鋒隊第二小隊警員，在美孚橋設路障截獲賊車，並成功拘捕三名疑匪。負責指揮堵截賊車的張立揚督察表示，「當時收call得知賊人有刀及涉及巨款後，當機立斷動用全隊人手進行堵截，分批設置路障，截到賊車後聽到有賊匪跳橋逃走一刻，確實個心離一離，好驚啲伙記會一齊跳橋，幸好大家都無事。」
力擒其中一名疑匪的警長陸海安稱，當時設置路障一分多鐘，立即發現賊車駛至，並看見賊匪跳車四散逃走，他即時進行追截，陸稱：「當時最重要都係攬住幾兄弟安全先去追賊。」在追賊過程中，最擔心是路面的汽車，「因為啲車真是好快，佢唔會讓你，即使你着住軍裝。」幸好在後面有同事跟住，幫手截停車輛。
擒賊警長 曾圍捕季炳雄
陸警長續指，「唔擔心個賊走唔甩，擔心佢跌死多啲。」因為橋面距離地面約三層樓高，「佢選擇呢條路行，我阻止唔到佢。」他追到橋面，靠本能及市民報料，知道一名跳橋跌傷腳疑匪登上巴士，他隨即衝上巴士下層將他拘捕。疑犯雖然可以說話，但腳部骨折，醫生指他暫時不能錄口供。陸警長加入警隊廿一年，已婚，妻子為空中服務員，育有幾歲大孩子，他指曾參與過圍捕季炳雄、港鐵縱火等驚險大案。陸又指，「父母睇見我追賊都擔心，事後需要立刻向兩老報平安。」
