政情：流感停課 徐英偉為兩子安排抓爆頭
因應流感大爆發，教育局前日宣布幼稚園同小學尋日起停課，但突如其來提早放年假，就令唔少家長大失預算，而勞工及福利局副局長徐英偉（Caspar）亦係受害者，大嘆兩個仔多放一個星期，要「抓爆頭」為佢哋安排活動。
提醒應避免增傳染機會
作為問責官員，Caspar坦言無「內幕消息」，同市民一樣喺尋日朝早先知道停課安排，依家頭痛緊點安排兩個仔喺停課期間嘅活動。佢笑言兩個仔知道唔使返學，即要求去圖書館同博物館，又話要去沙灘執垃圾，但佢一早有工作安排，只能叫工人姐姐代為照顧。佢又發現唔少家長喺電話群組內安排仔女喺停課期間上學習班，甚至相約去溜冰，佢就提醒話今次停課因流感而起，應避免增加傳染嘅機會。
另外，近年港府銳意推動STEM（科學、科技、工程及數學）教育，學校不時透過電腦遊戲代替書本做練習，Caspar話開心見到兩個仔唔使攞住本書死背，但當兩個仔長時間打機時，佢同太太就會煩惱應唔應該收機，「因為佢哋都叫做溫緊書嘛」。