政情：去「正生」剪頭髮 梁栢賢後生30年
最近醫院管理局應付流感忙到甩轆，醫管局行政總裁梁栢賢（PY）頻頻出場撲火。不過作為成功男士，個人形象始終重要，明年就「登陸」六十歲嘅PY，前日喺Facebook上載個人靚仔相吸Like。原來佢剪咗新髮型，話佢後生三十年都信呀！邊個係佢嘅髮型師呢？咪係「正生」囉！
網民大讚似韓星
講緊嘅係專為青少年戒毒嘅正生書院，一四年喺灣仔道開設飛髮舖「Z-Cut」，學生有機會實習理髮。PY係灣仔街坊，有日路經舖頭後上網睇相關剪報，覺得都幾有意義，決定「出頭」支持。之不過，當日操刀嘅似乎唔係正生學生仔，而係店內老師傅。
PY剪完新髮型大獲好評，連醫管局主席梁智仁都留意到。PY當然好happy，仲話以後要再幫襯。其實PY個幾月就剪一次頭髮，喺Z-Cut剪一次頭只需六十蚊，價錢相當實惠，難怪佢喺Fb大力推薦：「十分有水準，可以一試！」有網民即讚髮型襯PY面形，甚至似韓星Oppa。不過，前線醫護人員做到焦頭爛額，唔知新髮型幫唔幫到PY減輕前線怨氣嘞！