政情：董吳玲玲：偏激大學生只佔少數
近年本港多間大學都出現港獨思潮，又先後爆出咒罵死人同爆粗辱罵教師等風波，令唔少原本有意捐錢畀大學嘅善長卻步。不過，善德基金會主席董吳玲玲尋日出席一項大學捐贈儀式時就話，相信比較偏激嘅學生只佔少數，其他大部分學生都係專注學習，唔應該因而影響對大學嘅捐款。
董太認為社會各界同家長應多同呢啲偏激學生溝通，擴闊佢哋嘅視野，等佢哋睇嘢可以全面啲，唔好偏聽偏信。
捐200萬予嶺大增學習室
董吳玲玲同老公董中浩過往亦多次捐款興建學校，今次就捐二百萬元畀香港嶺南大學，增設一間廿四小時運作嘅學習室，方便嶺大生通宵溫習。佢話嶺大嘅基層學生比較多，所以決定捐款畀嶺大，希望同學可透過「知識改變命運」，成為未來嘅社會精英。剛獲續任嘅嶺大校長鄭國漢都有出席儀式。