中環出更：覆核王亂爆響口 何君堯斥涉誹謗
外號「長洲覆核王」嘅郭卓堅尋日喺社交網站話有特大消息，指立法會議員何君堯被廉記立案調查有關選舉舞弊及虛假聲明，相信郭卓堅所指嘅廉記就係廉政公署。何君堯回應呢件事時反斥郭卓堅涉及洩密或誹謗，強調自己未知廉署有冇查佢，會去信了解。
何指會去信廉署了解
何君堯話唔知廉署係咪已經立案調查佢，會去信廉署查詢，如果真係立案調查佢，相信一定會通知佢，如果廉署冇公布，質疑郭卓堅喺邊度知，「佢係投案人吖，定係收到通風報信呀？」佢話無論如何，如果郭卓堅未得到批准就「亂爆響口」，就係涉及犯法，「如果冇嘅，咁我就會同佢計數嘞，就係誹謗o架啦喎，你居心何在呀？」
佢話若去信廉署後，發現真係調查佢，都係廉署同佢之間嘅事，「幾時輪到你呢條粉腸喺度阿芝阿佐，喺度亂咁吠呀，狗年都未到」。
翻查資料，根據《防止賄賂條例》，若任何人喺無合法權限或合理辯解，而披露廉署受查人士身份或正受調查嘅事實或該項調查嘅任何細節，即屬犯罪，一經定罪，可處罰款兩萬元及監禁一年。
卓妮