中環出更：西裝只睇剪裁唔夠 郭浩泉：要講Style
「人靠衣裝」向來都係社會嘅潛規則，男士尤其要西裝革履，先至顯得莊重同帥氣。保良局總理郭浩泉（Patrick）亦深明此道，仲話西裝剪裁好唔夠（口架），仲要講Style，所以一切要從細節着手，尤其係西裝配搭都好重要。
Patrick嘅爸爸係莎莎國際主席郭少明，佢以前不時會着爸爸嘅西裝，但當身材健碩咗之後再唔啱着就自行購買，發覺歐美品牌嘅剪裁同亞洲人嘅身形有落差，搵師傅度身訂造又嫌款式太過保守，後來喺朋友介紹下搵嚟爺孫三代都從事洋服製造嘅陳熙文（Hayman）合作經營西裝零售，希望提升城中男士嘅衣着品味。
為咗自家嘅西裝品牌貼合本地人身材，Patrick話花咗三、四個月時間，邀請幾十位朋友到家中試身以收集身材數據，又話要西裝着得好睇，除咗合身嘅剪裁，其他諸如恤衫、領呔、鞋襪同飾物嘅配搭亦好重要。
邵家輝相當欣賞韓系品牌
Hayman亦話要顯露個人風格，喺布料或某啲小節處動吓腦筋，例如衫鈕以牛角或貝殼等自然物料嚟做，務求客人穿上後顯個人氣質。
對西裝都好講究嘅仲有立法會議員邵家輝，佢話自從進身議會之後，發現有同事嘅西裝竟然可以大紅大綠，從而扭轉佢認為西裝必須黑、藍、灰嘅刻板印象。佢又話近幾年韓系西裝有倣效意式西裝嘅趨勢，所以韓系品牌嘅西裝佢都相當欣賞。
雷禮權健身貼合現成西裝
不過，「九巴後人」雷禮權就唔鍾意韓系西裝，話韓國男星個個白臉紅唇，脂粉氣色過濃連帶韓式西裝都唔夠剛陽味，又話現成嘅西裝，往往係按理想嘅身形而製，所以佢向來都堅持健身，務求以自己嘅身體去貼合現成嘅西裝，而唔係度身剪裁由西裝去迎合自己嘅身形。
卓妮