中環出更:威士忌溝熱橙汁蜜糖 徐晉暉「鬼佬」配方醫感冒

最近寒流襲港加上進入流感高峰期,一個唔小心就好容易病。中華廠商聯合會會長吳宏斌尋日同一眾副會長齊出席就職滿月午宴,講起預防感冒偏方話題時,身兼展覽服務公司主席嘅副會長徐晉暉話曾經聽朋友教路,當患輕微感冒時,可用威士忌溝埋熱橙汁同蜜糖飲,佢試過真係有用喎。

徐晉暉笑笑口話呢個偏方係一位外國朋友教嘅,係「鬼佬」配方,可能因為威士忌酒精濃度高,可以殺菌啩!佢試咗的確好啲啲,感冒亦都好番添。另一位副會長盧金榮就話未曾聽過呢個偏方,但佢都相信飲酒可以殺菌。

史立德飲熱檸水增抵抗力

廠商會行政總裁楊立門啱啱病完,佢話咳咗好耐,以前試過坊間流傳嘅燉橙、燉川貝、雪梨等止咳秘方,但係都無效,所以今次佢乜嘢都唔使做,只係多啲休息、飲多啲水。鍾意唱歌嘅副會長史立德就話有朋友教佢飲啲酒開聲,但佢未試過,覺得喉嚨唔舒服要飲多啲水就真,尤其依家流感咁嚴重,更加要小心。佢朝朝飲一杯熱檸水,最緊要補充維他命C,增強抵抗力。

講到病,盧金榮話細個試過食錯嘢,將放喺雪櫃嘅隔夜肥豬肉未整番熱就食落肚,結果梗係肚屙啦!

同場仲有今屆新丁副會長馬介欽、吳宏斌同黃震等人,吳宏斌又笑稱同吳國安係「撈亂骨頭」,因為兩人英文名都叫做Dennis Ng,好多人經常分唔清邊個係邊個。吳國安話試過收到傳畀吳宏斌嘅微信,好彩都係正面嘅,冇乜嘢唔見得人嘅秘密喎。吳宏斌話上任一個月來忙於實現競選政綱,包括推動再工業化同年輕人傳承等,仲打算舉辦大規模獎項,以吸引企業投入資源搞創新創意。

卓妮

第一手消息請下載on.cc東網iPhone/iPad/Android/Windows Phone Apps