政情：羅致光憶搬Office勁揼三千磅垃圾

無論係屋企定係Office，每次大掃除都要清走好多垃圾，但勞工及福利局局長羅致光喺未入熱廚房之前曾經搬Office，嗰次掉咗三千磅垃圾！嘩！乜嘢嚟o架？咁誇張！

羅致光話喺二○一二年搬Office嗰陣，一共執咗三十個大膠袋，每袋成一百磅，即係成三千磅垃圾啊！佢話大部分都係文件同書，不過嗰次經歷就唔係太開心，因為有一箱研究資料唔見咗，而呢箱資料連政府都冇Back up，雖然唔係乜嘢機密資料，但唔見咗都實在好可惜，至今都仲好耿耿於懷！

早前趁住聖誕節假期，佢亦都幫屋企大掃除，結果一共清咗九大袋紅白藍袋！佢話當中最多嘅係T-shirt，因為有時出席活動時都會着番件相關嘅T-Shirt，但趕住走又冇時間換番出嚟，結果拎咗返屋企，積埋積埋就好多T-Shirt，今次執番晒出嚟捐出去，睇吓幫唔幫到有需要嘅人！