政情：張建宗座駕 政總外撞車
政府近日風波不斷，真係頭頭碰着黑，正所謂「黑開有條路」，署理特首嘅政務司司長張建宗尋晚都出咗事！張建宗嘅座駕被人拍攝到撞車，位置仲要喺俗稱「公民廣場」嘅政府總部東翼前地對出馬路，即係有可能一駛出政總就出事啦！
事發時唔喺車上
社民連嘅吳文遠喺社交網站貼出一張相，並發文問「邊個咁黑仔，撞車撞正政務司司長架車」。從照片可見一架「CS」車牌嘅車與前面嘅車發生意外，周遭仲有多名警員到場處理事件。政務司司長嘅英文簡寫係「CS」，呢架涉事車輛正正就係張建宗嘅座駕。
睇番吳文遠上載照片嘅時間係八點幾，出名「唔放工、唔放假」嘅張建宗，就算呢個鐘數先離開政總，相信都唔出奇。不過，據知張建宗並唔喺車入面，幸運避過小意外，唔知面對高鐵「一地兩檢」等多個炸彈，張建宗又有冇咁幸運呢？