中環出更：要求政制會議改期 廖長江信唔過阿鼎？
立法會政制事務委員會會議原定喺三月十九日召開會議，然而委員會主席廖長江尋日發信畀全體委員，指因事未能主持該次會議，要求改期。其實委員會副主席係周浩鼎，廖長江寧願要求會議改期都唔交畀副主席主持會議，唔通佢信唔過周浩鼎？
全國人大同全國政協將於三月喺北京召開會議（兩會），而港區全國人大同政協喺嗰段時間都會留喺北京開會，連任港區全國人大嘅廖長江亦唔例外，據聞人大會議將會去到三月二十日，相信廖長江話「因事」主持唔到政制事務委員會，應該係因為仲喺北京開會。
周浩鼎：有事改期好平常
之不過，廖長江主持唔到會議，可以由副主席頂上，加上嗰日會議仲未定出議程，點解佢索性要求會議改期再開呢？唔通怕周浩鼎主持會議會甩轆？
我哋問過周浩鼎係咪廖長江信佢唔過？佢話冇啲咁嘅事，又話過往佢亦曾主持過政制事務委員會會議，而因為主席有事要改期開會其實好平常，其他嘅事務委員會都有啲咁嘅情況，呢啲根本係好平常嘅事。
卓妮