唔少立法會議員都係區議員出身，躋身立法會後就成為「雙料議員」。不過做雙料議員雖然拎兩份糧，但就一啲都唔容易，隨時分身不暇，搞到兩頭唔到岸，所以當中唔少人當選立法會議員後就唔再角逐連任區議員喇。政圈近日有傳，下屆區議會選舉身兼九龍城區議員嘅立法會議員梁美芬正考慮唔再競逐，交棒畀新人。而身兼元朗區議員嘅立法會議員梁志祥亦或會有新動向，不過就唔係唔選，而係轉區參選。唔知兩人最終係成功交棒，定係會變成跌棒呢？

雖然梁美芬多年來身兼區議員及立法會議員兩職，但有熟悉梁美芬嘅地區人士就話，內部都認為梁美芬所屬嘅黃埔東地區工作做得幾好，而梁美芬依家正試緊水溫，睇下可唔可以交棒畀新人，咁樣佢一來可以專注立法會工作，二來亦都可以培訓新人，協助其他新區以至全港嘅事務，不過依家都未作最後決定嘅。睇番二○一五年、即現屆區議會選舉，黃埔東選區當時成為焦點，皆因角逐連任嘅梁美芬受到青年新政游蕙禎挑戰。雖然梁美芬最終有驚無險擊敗游蕙禎，但如果嚟緊真係打算交棒畀新人，新人係咪可以頂住本土派同泛民嘅壓力成功接棒，真係要小心評估喇。

至於另一名盛傳會喺下屆區議會交棒嘅梁志祥亦身兼元朗天耀區議員多年，仲曾經試過自動當選添。地區早有流傳，梁志祥正考慮唔再喺原區競逐連任，打算轉區參選，因為元朗、天水圍一帶人口上升，可能會有多個新區出現，梁志祥轉戰新區嘅話，原區就可以畀新人接棒，議席分分鐘有進帳。但亦有分析指，梁志祥今屆區議會選舉僅以約一百六十票之差勝出，如果下屆真係交棒，仲要撥出額外資源去打新區，隨時兩區都落空。

要退下火線令新人成功接棒並唔容易，要一石二鳥成功交棒之餘，議席仲要有進帳就難上加難，「to be, or not to be」，步棋點行真係要諗清楚至得喇。