政情：公民講場：處理虐兒指引亂晒龍 羅致光急補漏

近期發生連串嘅虐兒事件，勞工及福利局局長羅致光尋日喺網誌話社署喺一五年修訂過《處理虐待兒童個案程序指引》，但依家政府眾多部門、學校、機構都有無數唔同範疇嘅指引，當局會檢視同完善有關制度，仲會加強培訓同支援前線工作人員，去掌握同適時運用所有指引。講白啲，問題早就存在，只係政府當睇唔到，羅致光依家先補漏已經太遲，再唔全面檢視埋其他政策嘅話，可能仲有好多隱藏嘅都市炸彈會爆出嚟。