中環出更：何君堯點餐甩轆 嗌牛肉變豬肉
由於立法會好多會開，唔少議員因為公務繁忙抽唔到身出街食飯，都會向立法會餐廳點餐。尋日全世界突然收到一個電郵，內容竟然係議員何君堯嘅午餐餐單，仲指明要生炒牛肉飯，唔通呢個係佢至愛？仲要將至愛同全世界分享？
秘書誤將餐單電郵全世界
何君堯事後解釋，話因為尋日朝早係行政長官答問大會，跟住立法會又續會嘞，所以工作比較忙，為咗方便快捷就試下點餐，於是叫咗秘書幫手安排，當時佢交帶秘書話唔要燒味同臘味就得嘞，所以點餐叫生炒牛肉飯，其實係秘書嘅主意，而唔係佢一定要食生炒牛肉飯嘅。點知秘書忙中有錯，將個電郵send咗畀全世界，搞到全世界都知佢食乜嘢。
更有趣嘅係，因為立法會餐廳尋日嘅餐單係冇生炒牛肉飯，結果何君堯嘅午餐變咗係印尼豬頸肉炒飯，竟然由食牛變咗食豬，真係叫個午餐都一波三折呀！不過，何君堯話冇所謂啦，雖然印尼豬頸肉炒飯味道麻麻哋，但係佢冇嫌棄，仲食晒成個飯添，唔好浪費咁話喎。
卓妮