中環出更：委員會選正副主席 郭家麒「雙輸」
立法會公屋及居屋商場、街市及停車場事宜小組委員會尋日首次開會選正、副主席，期間兩度出現提名人同票嘅情況，結果公民黨（公文袋）嘅議員郭家麒兩度抽籤都輸咗，竟然「雙輸」，認真黑仔。
同票抽籤 兩次都輸
由議員涂謹申主持同進行正、副主席選舉，秘書處一共派出四十六張選票。郭家麒同身兼行政會議成員嘅林健鋒分別獲提名為主席候選人，二人各獲二十三票打成「平手」，最終涂謹申按程序抽籤決定，涂更笑指自己以「上帝之手」抽籤以決定主席誰屬，結果林健鋒得二十四票當選。林健鋒喺當選後笑言感謝涂謹申雙手，又話會秉承立法會公平公正作風，畀各位議員有足夠時間發揮。
到咗選副主席，郭家麒同工聯會何啟明獲提名，二人又以二十三票「打和」，由主席林健鋒負責抽籤，結果由何啟明當選副主席。換言之，郭家麒即係「雙輸」喇！
得出咁嘅選舉結果，新民黨嘅葉劉淑儀其後話：「選完喊都無謂、有啲人好失望，但節哀順變，諗吓點用呢個平台做好監察工作」。
卓妮