日前兩宗致命交通意外，讀之令人神傷。一宗是二十七歲媽媽在大欖隧道轉車站候車遭撞斃，遺下兩歲稚子，貨櫃車司機涉嫌危險駕駛導致他人死亡被捕。報道指司機疑直踩十六小時，警方不排除有人「瞌眼瞓」肇禍。
另一宗為的士撞飛電單車，鐵騎士重傷亡。從錄下的片段可見，五十五歲中年電單車迷駕其「綿羊」在葵涌支路雙白線停車時，遭尾隨空載的士疑無停車兼減速下撞尾，鐵騎士被凌空剷起墮地疑頸骨折斷昏迷，傷者送院後不治，遺下病妻及一對仍在學的兒子。據稱疑有人玩手機出事。
老朽看了兩則車禍新聞，除了難過，更不是味兒，自己駕車逾四十年，到如今依然感到在香港揸車確如在虎口，原因是盲毛司機太多。香港職業司機多，像駕大型貨櫃車的司機若因揸車時間太長，本身又長期睡眠不足，咁揸住架貨櫃車同揸住架坦克車冇乜分別。老朽試過畀架貨櫃車逼到埋石牆，狂響號下司機才扭回自己條行車線，並示意唔好意思，相信佢係瞌眼瞓而無意識「游」咗部車過嚟！早前有巴士司機肇禍，究其因也是長期加時工作。事實上，為了道路及乘客安全，職業司機有必要規管工時。
此外，香港特別多躁狂駕駛者，郁吓就響號閃燈，甚至指罵稍為慢駛的前車；有時明明自己出錯，依然聲大夾惡。早前有段片，一輛搵食貨Van的司機因小故多次爬頭再煞車兇人，囂張狂妄令人不齒；亦有的士竟然當前面的警車冇到，雙白線夠膽死照爬頭。
盲毛出沒注意，死神來了避無可避！老朽深信馬路上的慘劇多因司機駕駛時心不在焉，完全無留意路面情況；對於呢類盲毛或鹵莽駕駛者，若不幸遇上，只能自嘆運滯。老朽希望駕駛者尊重他人生命，揸車時務必專注，尤其切勿玩手機，為己為人，養成良好的駕駛習慣。