政情：憂延遲畢業 張國鈞趁假期刨書
聖誕及元旦假期啱啱過去，唔少人會大搞派對狂歡或離港旅行，但係呢啲精彩節目就同立法會議員張國鈞（Horace）完全無緣，皆因佢趁假期為博士課程刨書、趕上進度，否則隨時要延遲一年先畢到業。
身兼三職 仲分身修讀博士
Horace身兼行會成員、立法會議員同區議員三職，原本工作已經密密麻麻，但係佢喺舊年九月仲報讀港大公共行政博士課程，變成分身不暇。尤其係早前立法會上演支持「一地兩檢」、修改《議事規則》嘅連場大戰，即使Horace讀嘅係晚間課程，但都要走吓堂，又無乜精神做功課，搞到進度落後。
自認對政策行政認識不足
Horace話，雖然課程係四年制，但係佢都預咗會遲畢業，仲專程問埋校方，得知最多可以遲兩年讀完，先至安心啲。咁忙仲要去讀書，Horace話係因為發現同官員傾政策時，自己對政策同行政嘅認識不足喎。