政情：藍鴻震為學會籌款 搏老命跑10公里賽
長跑運動近年於香港蔚然成風，綽號「藍爺」嘅民政事務局前局長藍鴻震亦都追上潮流，將會參與即將舉行嘅馬拉松十公里賽事。問題係佢未跑過馬拉松，為咗迎接人生首次嘅長跑賽事，近四個月來佢密密練習，真係搏晒老命。
有信心兩個鐘內完成
咁搏為乜？原來佢係國際專業管理學會會長，有會友建議參加馬拉松賽事為學會籌款。藍爺覺得意見唔錯，但又擔心無能力應付，皆因自己年紀大，又唔擅長長跑，心諗不如等多一年再作打算。但後來諗吓，拖多一年又老一歲，只會更缺氣力，於是就的起心肝報名參賽喇。
藍爺話，佢由零開始，依家已經可以一口氣於一個鐘跑七公里。所以如果賽事當日天氣良好，有信心喺兩個鐘之內完成賽程咁話。