中環出更：高永文做番醫生 遇「喬裝病人」探班
食物及衞生局前局長、骨科醫生高永文去年中離開官場，早排已私人執業做番醫生老本行，佢早前出席一個推廣器官捐贈嘅活動時談及最新近況，透露雖然依家病人數目唔算好多，但已經好忙碌，佢仲發現有幾個係「喬裝病人」，特登嚟睇病關心佢，聽落高永文同病人嘅感情真係幾好！
離開官場一身輕
高永文話，撇除有時會離開香港做義工，依家一個月睇病約十六至十八個工作天，上、下晝各睇症三小時，每個半晝最多睇六至八個病人，即係每日最多睇十幾個病人，佢形容咁樣足以令到佢好忙，當中有啲係以前嘅病人，專登都返嚟搵佢睇病，另有部分舊病人喺呢幾年都冇事，而且身體健康咗，佢都相當開心。
無官一身輕嘅高永文又話，依家除咗應酬少咗，又唔使日日望住新聞有咩發生，冇咩壓力，唔似得以前一望到新聞，例如見到流感爆發等就要即刻去處理。高永文出席活動時談笑風生，相信佢都好享受做番老本行嘅生活嘞！
卓妮